來自埃塞俄比亞嘅耶加雪夫咖啡豆

之前同大家分享咗我用咖啡嚟配合情人節嘅心得，唔知你地有無參考我嘅情人節精選大餐去冧吓另一半呢？

上次向大家簡單地介紹咗幾款咖啡豆，跟住落嚟一於就分享吓我自己對呢幾種咖啡豆嘅感覺啦。首先，就講吓來自非洲埃塞俄比亞嘅 ─ 耶加雪夫。

非洲係全球第三大嘅咖啡出產區域，而埃塞俄比亞，更加係傳說中咖啡嘅發源地！至於耶加雪夫，就係埃塞俄比亞其中一個主要嘅咖啡出產區。當地位處海拔1,700 — 2,100公尺，出產阿拉比卡(Arabica)品種嘅咖啡豆為主。而該地區有優良嘅微型氣候，四季如春，無論係日曬豆，或者水洗豆嘅品質都一樣出色！

耶加雪夫咖啡豆嘅特色係：聞落去帶有濃郁嘅花香味，飲落去就有柑橘類嘅果酸香及果甜味道，仲有清新嘅茶香！耶加雪夫咖啡豆嘅層次豐富，有細緻嘅醇厚度，餘韻亦相當長！所以耶加雪夫實在係一款從名字到味道都十分吸引、令人回味無窮嘅咖啡呀！

各種風味嘅咖啡可以配搭唔同嘅食物，從而產生微妙嘅化學作用

雖然已經係初六，不過都要同大家拜個年：祝各位龍年行好運~~日日都有好咖啡飲啊！

話咁快農曆新年就忙（玩）完喇，望下日曆，好快又到情人節喇喎！之前我比賽嘅故事都講到咁上下，今次一於就同大家講下情人節嘅話題啦。

情人節嘅時候，應該好多情侶都會食情人節大餐。年年要諗食啲咩，其實都幾煩惱。與其出去同人逼，不如自己準備大餐好過！食物以外，飲品配搭都好重要架，我嘅選擇就當然離唔開 --- 咖啡！不如就等我分享下自己嘅心得，俾啲靈感仲未有頭緒嘅朋友啦！

各種食材嘅濃淡口味都唔同，所以可以用各種味道嘅咖啡嚟襯托番，等另一半感受到你嘅細心！今個情人節不妨設計一個充滿非洲風味嘅咖啡盛宴啦：

前菜 --- 凱撒沙律，我會揀配肯亞AA：因為凱撒沙律味道較濃、芝士味比較重，肯亞AA咖啡豆嘅酸度相對高一啲，可以降低沙律味道濃嘅感覺。而且肯亞AA帶有莓香味，飲落去感覺清新，係開胃嘅好選擇。

主菜 --- 烤鴨胸，我認為可以配埃塞俄比亞嘅哈拉：因為鴨胸本身帶輕微臊味，埃塞俄比亞嘅哈拉咖啡豆則帶一啲啲薑味，所以可以中和殘留喺口入面嘅臊味。另外，由於哈拉豆帶有香甜水果味道，配烤鴨胸嘅話兩者配合得剛剛好。

甜品 --- 焦糖香蕉忌廉批，配埃塞俄比亞嘅耶加雪夫就最好不過：食完甜甜蜜蜜嘅焦糖香蕉忌廉批，最好就由耶加雪夫為晚餐畫上完美句號。因為耶加雪夫有清新嘅花香同橙香味，有助減低甜品膩滯嘅感覺。而且耶加夫嘅餘韻比較長，咁你同另一半就可以慢慢回味呢一個情人節大餐啦！

溫馨小提示：記得喺飲咖啡之前，飲少少水 ─ 因為清潔一下口腔，可以令你更加清楚咁感受到各種咖啡嘅真正風味，同埋咖啡與食物產生嘅微妙化學作用呀！

冠軍寶座最後花落誰家？

完成咗決賽，知道咗自己嘅分數之後，終於放下心頭大石，輪到我可以睇吓其他選手嘅比賽過程。果時仲有幾個選手要準備出場比賽，我就可以輕輕鬆鬆地喺場邊欣賞吓其他人嘅表現。有啲選手好風趣幽默、有啲嘅流程好清脆利落，基本上每個參賽者嘅表現都相當吸引。

當剩番最後兩個選手要出場嘅時候，忽然有個工作人員嚟問我：「高兒你搬走咗比賽嘅用具未呀？等陣可能會叫你拎啲工具出去表演吓...」當時我覺都有啲疑惑，不過以為自己係決賽唯一一個女選手所以大會搵我幫手，咁好啦，我就搬番啲工具打算等一陣出去玩吓。

十個決賽選手終於都完成晒比賽喇，大會宣佈頒完所有獎項先輪到表演環節。就喺呢個時候，無啦啦有人行埋嚟恭喜我，我呆一呆，覺得有啲奇怪又有啲緊張......

頒獎前，所有決賽選手再一次出場，喺台前集合。我望向人群，見到戰友們同LOC都好似傻咗咁跳起指住我，我心諗：「自己唔係有獎拎呀馬？！」跟住我開始覺得腳震...

大會開始頒獎喇，司儀宣佈第三名......（唔係我丫...）第二名......（都無我份...）第一名......「...高兒...！」當我聽到第一名係自己嘅時候，個腦一片空白、個人緊張到不得了，仲忍唔住不停流眼淚。果一刻先知道原來領獎真係會喊架！好彩我唔需要致謝辭咋，喊住咁點講到野呢！

喺呢一刻，我先終於明白點解工作人員頭先叫我準備出去表演，真係後知後覺喇我...！